特派影豬　現場伏擊

聾貓師兄今個夏天去左抖暑，今年夏日國際電影節由我影豬做吉祥物，而榮譽大使就繼續由何韻詩擔任。呢日阿詩去到將軍澳東港城為Summer IFF造勢，成班粉絲一早聞風而至，但係我面對偶像好怕醜，唯有隱身係後面做布景板。

 記者會上宣佈Summer IFF賣飛好理想，多部好片如《如果．愛在寶萊塢》、《七人組激鬥鄉警700日》及《六個大師的童年》好賣到簡直係一票難求，所以大會決定加開場次，聽到我地班影豬幾開心呀，撲飛要趁早呀。

唔單只係第二年做榮譽大使，阿詩仲係Summer IFF既榮譽粉絲，因為佢一早已經刨熟晒本場刊，仲推介《情尋水百合》非睇不可，除左當中既少女成長故事令阿詩好感興趣，仲因為題材有講韻律泳，同佢既歌一樣！

阿詩睇電影都聯繫到唱歌，大會當然要介紹佢睇今年特備既印度寶萊塢歌舞片，仲送左張我既寶萊塢造型照俾阿詩忝，諗返起都覺得面紅。不過在場既粉絲反應好熱烈，仲踴躍搶答阿詩問既問題來換戲飛，場面不知幾熱鬧！

遲下當日既精彩場面同阿詩的官方訪問內容就會放埋喺呢個Blog度，記得上嚟check實啦！